Iniciar sesión: Acceso

Saída a Lugo

As saídas sempre son un momento de riqueza, de ver cousas novas, de aprender fóra da aula, de compartir momentos emotivos entre mestres e alumnos/as.

Hoxe, foi un día deses. O noso itinerario foi o seguinte:

• Lagoa de Cospeito

• Casa – Museo Manuel María (Outeiro de Rei)

• Castro de Viladonga (Castro de Rei)

Saímos ás 9.30h do colexio, dirección Lugo. A viaxe pasouse rapidamente entre ilusións, cancións, risas…

A Lagoa de Cospeito foi a nosa primeira parada. Aproveitamos para merendar algo rápido e iniciamos a marcha. Este ano o Proxecto Voz Natura céntrase nos ecosistemas, así que este foi o noso punto de partida, a maneira de iniciarnos neste proxecto.

Fixemos dous grupos: Infantil, 1º, 2º e 3º. No outro grupo ía 4º, 5º e 6º.

O primeiro grupo fixo unha ruta máis curta, coñeceron o entorno, a fauna, contáronlles un conto… O alumnado de 4º, 5º e 6º fixo unha ruta un pouco máis longa.

Foi incrible facer sendeirismo entre tanta tranquilidade, disfrutar da natureza, respirar aire puro…aprender tantas cousas.

Este humidal intégrase dentro da Rede Natura 2000 ao formar parte da Zona Especial de Conservación chamada Parga – Ladra – Támoga. Alberga unha importante representación de hábitats húmidos, moitos deles tipificados como de interese europeo.

Entre os valores máis destacados débense destacar os queirogais e herbazais húmidos e os hábitats de auga doce estancada.  As accións de conservación na Lagoa céntranse na creación de charcas estacionais e na eliminación de especies exóticas.

Alberga especies en perigo de extinción coma o Cardiño das Lagoas.Trátase dunha pequena planta acuática considerada como especie prioritaria.

Despois, dirixímonos a Outeiro de Rei. Visitamos a Casa – Museo de Manuel María. Este ano o Día das Letras Galega dedícaselle a este poeta galego; destaca a súa loita por Galicia, polo noso idioma…Un referente no panorama literario galego. A finais dos anos 60, xunto coa súa dona Saleta Gai, crearon a Librería Xistral en Monforte, e pouco despois a editorial co mesmo nome.

Esta visita serviunos para coñecer máis sobre Manuel María. Ademais preparar a nosa viñeta para o calendario Estiño, que este ano se centra na figura deste gran autor. O noso centra indagará sobre a súa etapa en Monforte.

Achegábase o momento de repoñer forzas e aproveitamos a Área Recreativa de Santa Isabel, a uns 300 metros do centro de Outeiro de Rei.  Tocaba un merecido descanso, aproveitando para comer, xogar un ratiño.

A última parada do día levounos ao Castro de Viladonga, en Castro de Rei. Trátase dun poboado fortificado de època Castrexa e Galaico – Romana. Por tanto, viaxamos ao pasado, coñecemos como vivían os nosos antepasados.

Vimos o Museo, e logo subimos ao Castro para adentrarnos nel, ver os seus restos, coñecer como eran as vivendas, como as construían…

Cos restos atopados reconstruíron como era a vida no Castro. Situábase nun outeiro, protexido por unha gran muralla. Vivían entre 200 e 250 persoas. As súas vivendas e demais construcións anexas dispoñíanse en grupos deixando rúas para circular persoas, animais e medios de transporte.

Moi ao noso pesar, era hora de regresar a Brollón. Merendamos e comezamos a viaxe de volta. Non paramos en todo o día, aínda así tiñamos forzas para volver no bus cantando, rindo…

Un día moi produtivo, que aproveitamos para ampliar os nosos coñecementos, para convivir…

“Dime y lo olvido, enséñame y lo recuerdo, involúcrame y lo aprendo”

Benjamin Franklin

Saída a Lugo (Martes 10)

O próximo martes, día 10, faremos a primeira saída deste curso. Será a Lugo e visitaremos:

-       Lagoa de Cospeito

-       Casa – Museo de Manuel María

-       Castro de Viladonga

O itinerario será o seguinte:

• 9.30h Saída do centro

• 11h Chegada á Lagoa de Cospeito

Faranse dous grupos:

-       Infantil, 1º e 2º: Recorren un anaco do bosque mentres os monitores lles dan explicacións.

-        3º, 4º, 5º e 6º:  Ruta circular de sendeirismo polo entorno da lagoa.

• 13h Visita á Casa- Museo de Manuel María (Outeiro de Rei)

• 14h comida

• 16h Visita ao Castro de Viladonga

• 17.30h saída de Lugo e chegada ao centro entre as 18.30h – 19h

Magosto

Onte, venres 6, celebramos o Magosto. O tempo deunos unha tregua e puidemos disfrutar desta celebración, con tanta tradición en Galicia.

Queremos agradecer ás familias a súa colaboración para que fose posible o Magosto, tanto coas castañas como coa leña.

Primeiro, sobre as 12h preparamos as castañas para poder asalas. Ao mesmo tempo Paco e os seus alumnos/as prenderon o lume.

Pola tarde, recollemos ditos populares, refráns, adiviñas sobre a castaña, sobre o magosto, para realizar un mural.  A verdade é que temos no cole unhas grandes debuxantes. Aproveitamos así para traballar co alumnado a importancia da castaña en Galicia, o que significa para os galegos.

Ás 14:45h chegou o momento ansiado de comer castañas, de compartir no patio momentos de risa cos compañeiros/as, de xogar…As castañas estaban moi ricas, no punto xusto.

Finalmente…o carbón pasou a un primeiro plano e puxémonos un pouco negros. As nosas caras de ledicia dino todo.

Foi un día moi positivo, no que aprendimos, compartimos, rimos, xogamos, medramos como persoas.

"As castañas queren en agosto arder e en setembro beber"

Comeza o novo curso

Chegou setembro e abríronse as portas do cole de novo...Os mestres xa estamos traballando e cargando as nosas de mochilas de ganas, ilusión,traballo, paciencia, novos retos, proxectos…

Aproveitamos para darvos a benvida aos nen@s que chegades ao cole e dicirvos a tod@s que calquera cousa que precisedes non dubidedes en poñervos en contacto con nós.

O xoves 10 comeza o curso 2015 -2016, e estamos seguros de que será un bo ano para tod@s.

reunión xeral de pais cambiase e será o vindeiro martes 6 de outubro as 16:00h.

Rematamos coa seguinte frase de Miguel Rojas Sánchez:

 

 

"La educación es el vestido de gala para asistir a la fiesta de la vida".

 

CONVIVENCIA NO CENTRO DE DÍA

O pasado xoves, día 11 vivimos uns momentos moi emotivos, cheos de ilusión, de ensinanzas.

Como en anos anteriores, visitamos aos  nosos veciños do Centro de Día para compartir tod@s un anaco da mañá.

Os nosos maiores son grandes persoas, cun corazón moi xeneroso e cargado de experiencia, de vivencias, de sensacións, de emocións…Temos que recoñecer que calquera palabra de agradecemento para eles se queda curta.

Quedamos verdadeiramente abraiados coa representación que nos fixeron da obra “A tía lambida”.

Despois, foi o turno para que algúns nenos contaran contos escritos por eles para o Nadal ou para as Letras Galegas.

Tiñan un agasallo preparado  para tod@s nós:  un marcapáxinas  cunhas palabras que animan á lectura, esa ventá que temos tan preto e que nos permite ollar o mundo, viaxar por el…

Marchamos coa sensación de que o tempo voara, de que valeu moito máis esta hora con eles que moitas horas no centro; foi unha clase maxistral.

Querémoslles dar as grazas pola súa hospitalidade, polo seu cariño, por todas as cousas positivas que nos transmiten, por tantas e tantas cousas

Grazas a eles e a tod@s os traballadores co Centro de Día por esta mañá e por outros moitos momento ao longo deste curso.

 

Vémonos pronto.

Excursión Voz Natura

O sábado 6 chegou a xuntanza anual dos colexios participantes no Programa Voz Natura. O lugar de encontro foi  Culleredo.

Saímos do colexio ás 9, e en torno ás 11 horas estábamos na Coruña, con gañas de baixar do autobús e disfrutar do tan ansiado día que tíñamos por diante.

Pola mañá pasámolo moi ben nas colchonetas, montamos a cabalo e vimos a actuación do Xabarín Club xunto coa entrega de premios dos coles gañadores desta edición.

Ás 14h era momento de facer unha parada e repoñer forzas, para afrontar con enerxía o resto do día. Comemos todos xuntos. De postre tivemos algodón de azucre.

Logo deste descanso,na xornada de tarde,  vimos os traballos de todos os colexios, fixemos un taller de prensa e incluso nos fixeron  debuxos. Tamén houbo tempo para a maquillaxe, globoflexia, para facer chapas…Gustonos moito ver o helicóptero da Garda Civil, os coches de tráfico…Fixéronnos un carné de tráfico.

A iso das 18:30 merendamos para poñernos rumbo a Brollón. Chegamos ao colexio ás 21 h aproximadamente, logo dunha xornada de convivencia, de bos momentos, de xogos…

 

Volveremos o próximo curso…

CONVIVENCIA BÓVEDA / BROLLÓN

Hoxe estivemos en Bóveda, no C.E.I.P Rosalía de Castro nunha xornada de convivencia. Estas saídas sempre as esperamos con moita ansia, con ilusión, con emoción…nuns anos nen@s de ambos centros serán compañeiros no instituto, así que cremos que é unha boa oportunidade para coñecerse, facer amizade, compartir xogos, conversas, unha comida xuntos…aínda que pareza un tópico a mañá pasou voando, unha mañá moi calurosa.

Chegamos a Bóveda ás 10:45h. Déronnos a benvida todos os mestres e nen@s que agardaban por nós con ganas.

O transcurso da mañá foi o seguinte: o alumnado de infantil estivo  no ximnasio e alí fixeron xogos, circuítos…non había máis que mirar a súa cariña para darnos conta do ben que o pasaban. Máis tarde, subiron aos columpios, xogaron coa corda, con pelotas…

Por outro lado, en primaria o seu mestre de educación física, Diego, explicounos que faría 8 grupos. Deberían ir pasando diferentes probas. Para conseguilo é moi importante o traballo en equipo, a cooperación, a comunicación

Nunha das probas tiñan que facer unha pirámide con vasos de plástico (5,4, 3, 2 e 1 vaso de abaixo a arriba)

Outra consistía en preparar unha pequena coreografía.

Unha que tivo moito éxito foi ir cos ollos vendados guiados polos demais compañeiros. Chegaban a un punto no que encontraban unha adiviña que debían resolver.

Un xogo popular, como as cordas, tamén tivo un oco nesta xornada de convivencia.

No patio cuberto, había unha proba que consistía en manter no aire globos a base toques con diferentes partes do corpo.

As carreiras de sacos provocaban gargalladas nos nen@s. Sempre lles gusta moverse coma canguros.

Unha proba que require moita concentración, moito traballo en equipo é a de ir todos xuntos cos pés atados uns a outros. Ou se traballa en equipo ou non se avanza.

Recorreron o colexio por fóra contando todas as ventás.

Unha vez superada cada proba, entregábaselles unha peza, que debían gardar para facer un puzle cando as superaran todas.

A maña foi avanzando e quedaba un pequeno ratiño para que xogaran ao fútbol, xa que a súa insistencia foi alta. En seguida chegou a hora comer, así que…todos a repoñer forzas. A verdade que logo dunha mañá tan movida e divertida veunos xenial.

Despois de compartir esta comida quedaron uns 15 minutos para saír a fóra; uns para descansar, outros para xogar…

Ás 14:30h era o momento de regresar a Pobra, o tempo de convivencia chegara á súa fin. Pero levamos bos momentos, bos recordos.

Temos que agradecer ao centro de Bóveda a súa acollida, a súa amabilidade, que nos fixeran pasar unha mañá tan especial.

 

Rematamos dicíndolles que o ano nos vemos na Pobra. Agardámosvos.

CENA PRO-EXCURSIÓN 5º e 6º

Acabamos de vivir un deses días que tod@s agardamos con ilusión, con entusiasmo, con enerxía…

Como sabedes, os 6 nenos de 5º e 6º van de excursión a Madrid na última semana de curso; levan tempo facendo cousas para sacar cartos para ela: vender rifas en Nadal, camisetas e…este venres pasado fixemos unha cea / convivencia, na que asistiron 110 persoas que forman parte da comunidade educativa (pais, nais, familiares, alumn@s, mestres deste ano e de anteriores).

En primeiro lugar, querémoslles dar as gracias a todos eles pola súa presencia,

Despois dunhas reunións, cos pais dos alumnos que van á excursión, para organizar esta cea, chegou o día…

O venres ás 4 da tarde estas familias e os mestres puxémonos mans á obra cos preparativos: colocar o comedor, poñer as mesas, preparar a cea, os regalos…en definitiva, que todo estivese a punto para as 9. Pouco a pouco foi collendo forma.

Tamén lles queremos agradecer ás familias o seu traballo, colaboración e implicación. E como non, á hora de dar gracias temos que mencionar dun xeito moi moi especial á nosa cociñeira, que leva no centro dende que abriu. Lola sempre disposta a axudar, cun sorriso na cara, cargada de paciencia.

Ao remate da cena os nenos tiveron un detalle con ela como sinal de agradecemento. Foi un momento emotivo ver como Lola se emocionaba, lles demostraba aos nenos/as o cariño que lles ten.

O menú foi:

   - Melón con xamón

   - Empanada de atún, empanada de zorza

   - Polo con ensalada

   - Biscoito con queixo

   - Xeado

   - Café

O  noso agradecemento aos provedores que colaboraron con alimentos para a cea: Panadería Roelma, Panadería Herbella, Comercial Buxán, Comercial Ana, Pescados Topi, Santorini, Comercial Sánchez Vado, Distribucións a Pinguela, Secundino Docampo, Disrela, Mafer Asturias, Discibrán, Frutas Yoli, O Fogón, Carnicería Real, Bonfrig.

Do mesmo xeito para o Concello, xa que o alumnado fixo un pleno e recibiron 300 euros.

Foi unha gran noite, na que a comunicade educativa compartimos momentos, falamos, rimos, intercambiamos opinións

 

Rematamos cuns regalos que se obtiñan co número da entrada. Estes agasallos para o sorte foron doados por: Leonides, Comercial Agro, Librería Fénix, Agrasar e Carlín.

 

Visita Tico e Lola

O venres 29 de maio, despois do recreo tivemos unha clase moi especial. Viñeron Tico e Lola, dúas persoas que están a traballar coa agricultura ecolóxica, moi amantes da natureza. Déronnos unha charla, así que soubemos moitas máis cousas do horto ecolóxico e das plantas en xeral. Foi na aula de informática, íannos proxectando imaxes… Aprendemos que os espazos naturais son auténticos puzles naturais perfectamente encaixados e non precisan intervencións. A natureza é unha cadea de relacións, todo ten un por qué..nada sobra nin falta. Se a deixamos medra por si mesma.Os animais viven e coidan a natureza e as plantas tamén. Polo tanto, nós  debemos ser prudentes coas intervencións, o que temos que facer e coidala.

Ensináronnos imaxes do seu horto  e tamén nos contaron moitas cousas  das plantas e das relacións que se establecen entre elas.

O primeiro é coñecer o chan… E como? Pois a través das herbas que medran nel. Descubrimos que plantas silvestres como o dente de León, as hortigas…son beneficiosas no horto. O dente de León ten as raíces moi profundas, entón  transporta os nutrientes ás raíces das plantas máis superficiais e elimina outras malas herbas; ademais é medicinal sendo bo para problemas de riñón.

O horto debe ser sostible: todo se aproveita porque unhas plantas dependen das outras e ata os animais que viven nese espazo teñen os seus motivos para facelo e aportan beneficios.  Por exemplo, as larvas das xoaniñas comen os purgóns.

As lombrices descompoñen os restos orgánicos de follas ou seres vivos mortos creando un estupendo humus.

Se mezclamos plantas aromáticas no horto aportámoslle unhas compañeiras estupendas porque ademais de favorecer espazos agradables, de adorno, tamén atraen os insectos que polinizan.

O clavel de indias limpa o chan de hongos.

A caléndula alexa os insectos que non nos gustan e macerada en aceite ten propiedades medicinais para a pel.

Se poñemos os allos cerca das fresas estámolas favorecendo, xa que limpan o chan de hongos que lle sentan mal ás fresas.

Tamén soubemos que se cubrimos o chan do noso horto con palla favorecémolo moito pois nacerán menos herbas e gardará máis tempo a frescura a terra co que teremos que regar menos.

A compostaxe: Temos dous depósitos nos que vertemos os restos orgánicos do comedor. Así aproveitamos os restos e reciclamos; pero tarda moito en descompoñerse. Tamén nos contaron algunhas medidas para que funcione mellor.

Despois de aprender tantas cousas nesta charla, visitamos o recuncho das plantas medicinais e soubemos máis propiedades das plantas medicinais que temos:

- Un anaquiño de lavanda debaixo da almofada axudarache a durmir mellor.

- Menta: ten moitas propiedades, tómase en infusión, é relaxante.

- Salvia: unha planta con múltiples propiedades beneficiosas.

Como vedes foi unha hora moi ben aproveitadaPara o curso que vén faremos innovacións no noso horto ecolóxico.

Para agradecerlles a súa presencia tivemos un detalle con eles.

 

E de seguro que volverán Tico e Lola contar máis cousas que nos seguirán enriquecendo e aprenderemos a  coidar e aproveitar mellor o noso horto.  Pero ademais tamén  o alumnado  tamén divulgará  esta información  aportándolla ás  familias, xa que tod@s  teñen un horto na casa. Será unha oportunidade estupenda de colaborar e acercarse máis aos coidados e valores dos nosos recursos.

Convivencia San Clodio

O pasado mércores 20 de maio chegaba o día da convivencia co CEIP de San Clodio; agardada por todos nós con moita ilusión, xa que unha das características do noso centro é a apertura ao exterior e ás convivencias.

Cada ano xuntámonos nun centro alternando os colexios. Un ano visítannos eles e ao seguinte visitamos nós San Clodio. Este ano tocábanos ir a nós,   así que ás 9:45 estabamos saíndo no autobús; moi expectantes e coas pilas ben cargadas preparados para xogar e coñecer máis sobre os xogos tradicionais.

Chegamos a San Clodio ás 10:15; o director do centro explicounos en que ía consistir a xornada e distribuímonos en grupos.

O espazo de lecer estaba dividido en estacións e en cada unha un xogo tradicional… así que fomos formando grupos con nen@s de ambos centros por cursos: infantil, 1º, 2º, 3º, 4º 5º e 6º. Cada grupo estaba acompañado por un mestre. Así que só quedaba ir escoitando ás dúas monitoras que nos distribuiron nas estacións e   puxémonos a xogar!!

As  monitoras  encargábanse de explicar as regras dos xogos, de dar algunhas instruccións nos de máis dificultade…e cando nos avisaban rotábamos de xeito que todos os grupos estivésemos en todas as estacións.

Case sen decatarnos xa era tempo dun descanso para tomar unha froita: melón, fresa ou uvas que estaban boísimas e que nos repuxo enerxías…. Tivemos media hora para tomar a froita e de xogo libre…así que os máis grandes  aproveitaron para unha avanzadilla de fútbol e  non perder o tradicional partido San Clodio- Pobra do Brollón.

Ás doce volvemos a xogar de novo.  Agora iamos aos que máis nos gustaron ou engancharon pero sempre xogando e ocupando unha estación libre.

Así foi como coñecemos e practicamos moitos xogos dos nosos avós e avoas: a chave, a rá, os zancos, os aros, a Mariola, as cordas, os bolos, os sacos

Xogando , xogando fixemos moitos amigos…e de novo ás 13:15 comezamos a lavar as mans para comer. Pasaron primeiro os de infantil que se sentaron en dúas mesas mezclados claro está,  pois había que aproveitar o tempo para compartir e coñecernos mellor.

Despois pasamos os de primaria, con un xogo que nos gustou moito. Cada neno de San Clodio levaba un ou dous de Pobra con él e así pouco a pouco fomos enchendo as mesas do comedor… A comida foi de novo un momento para seguir compartindo, e a pasalo ben tanto para o alumnado coma o profesorado. Por certo, estaba boísima; comemos de primeiro entremeses e  logo ensalada mixta  con empanada…así que repuxemos ben a enerxia.

Despois de comer voltamos a xogar. Os forofos do fútbol no polideportivo continuaron o partido. Outros xogaron fóra e os de infantil tamén na súa zona, nun areiro que está á sombra debaixo das  árbores; e no porche sacaron cantidade de xogos: cociña, mercadillo, cacharriños… en fin, que este día pasou deseguida.

Foi un día extraordinario, pois aprendemos moito dos xogos de antes, tanto das súas regras, dos materiais para xogar, e de paso da  forma de vida dos nosos  avós e avoas, pois todo está relacionado. Compartimos xogos e experiencias, e sobre todo afianzamos esa amizade que  a través deste tipo de actividades se vai agrandando ano a ano.

 

Distribuir contido