Actividades

25N DÍA INTERNACIONAL CONTRA A VIOLENCIA DE XÉNERO

Hoxe celebramos no noso cole o Día Internacional contra a Violencia de Xénero.

En Infantil traballamos o conto "ROSA CARAMELO" .

O alumnado de Primaria escribiu LEMAS moi importantes

CONTRA A VIOLENCIA  e POLA IGUALDADE.

Aquí tedes unha mostra do noso traballo

  

 

Tamén podedes ver o vídeo na aula virtual do cole

 

Ao final da xornada todos os nenos e nenas, persoal docente e non docente foron agasallados cunha camiseta e unha pulseira que xentilmente donou o Concello de Mañón.

    

Moitas grazas pola colaboración

Cultivamos La Paz

O alumnado do CEIP Francisco López Estrada celebra o Día da Paz cantando e cultivando o horto. Dúas actividades que dan bos froitos e compleméntanse á perfección. Seguiremos traballando duro o resto do curso, quitando malas herbas e plantando bos desexos. A disfrutar do vídeo!

Charla informativa sobre o proxecto Pilabot.

Hoxe, día 13 de febreiro, recibimos unha charla informativa sobre o proxecto e concurso Pilabot no que estamos a participar. O contido da charla, que abarcaba dende as diferentes clases de pilas, os seus compostos, partes e funcionamento, reciclaxe e reutilización, fíxose moi amena e o alumnado participou activamente plantexando novas preguntas ou respondendo ás que realizaba a relatora. Ademais o alumnado pasouno en grande co xogo final que propoñía unha serie de preguntas sobre o contido tratado. Como estiveron moi atentos á explicación foron moitos os acertos. E agora que sabemos a teoría hai que demostralo coa práctica. Debemos de ser responsables e tratar axeitadamente as pilas e baterías que temos na casa. Todas e todos a reciclar!

Pilabot

Charla informativa de AVIMÓS

Galiña de Mos

O día 12 de febreiro recibimos a visita da Asociación de Avicultores da raza de galiña de Mos (AVIMÓS). A charla informativa que ía dirixida a todos os niveis, infantil e primaria, presentounos a esta raza galega con denominación de orixe, así como o proceso de cría e incubación. 

Galiña de Mos 2

Ademais da visita e de toda a información que compartiron connosco, tamén nos trouxeron unha incubadora con dezaoito ovo ben fermosos. Se todo vai ben e os alumnos/as os coidan axeitadamente, dentro duns 21 días aproximadamente daremos a benvida a uns auténticos poliños de Mos. 

Se queredes máis información sobre a raza da galiña de Mos dispoñedes da páxina web oficial na que atoparedes diferentes recursos e materiais. Tamén queremos agradecer a visita da Asociación e de todo o material facilitado. Moitas grazas, amigos de AVIMÓs

AVIMOS

Xogade - Actividade Deportiva Escolar

O pasado luns día 3 de febreiro o CEIP Francisco López Estrada participou en Xogade, Actividades Deportivas Escolares organizadas pola Secretaría Xeral para o Deporte. Este ano o encontro entre varios colexios (CEIP Manuel Fraga, CEIP Nicolás do Río, CPI de Atios,... ) celebrouse en Valdoviño. O alumnado do noso colexio demostrou estar en boa condición física e alcanzou uns bos resultados, pero sobre todo pasárono estupendamente. Ademais tivemos un tempo estupendo resultando unha xornada moi agradable e estival, todo un luxo nesta época do ano. Estamos desexando volver o ano que vén. 

 

Reapertura da Biblioteca Municipal do Barqueiro

Caxoto1

A semana pasada o CEIP Francisco López Estrada foi convidado por parte do Concello de Mañón á reapertura da biblioteca municipal. Para celebrar o devandito evento contamos coa presenza do noso amigo Caxoto, que unha vez máis nos amenizou a xornada cunha estupenda selección de contos fantásticos e sobre todo co seu gran sentido do humor. Tanto pequenos como adultos pasámolo estupendamente e regresamos ao colexio con moitas ganas de volver visitar a biblioteca e de ler unha chea de libros. Queremos agradecer ao concello esta invitación así como a Caxoto polo seu bo facer e o seu gran sentido do humor. Pola nosa banda comprometémonos a ler moitos libros e visitar frecuentemente a biblioteca. 

Caxoto 2

Celebramos o día da paz - 30 de xaneiro

Cultiva la paz

A semana pasada celebramos no CEIP Francisco López Estrada o día da Paz (30 de xaneiro). Aproveitando que este ano estamos centrados no proxecto do horto escolar e do coidado da nosa contorna, eliximos unha canción moi apropiada "Cultiva la paz". Ademais de sensibilizarnos respecto da importancia de vivir nunha sociedade pacífica e sen conflitos, aproveitamos a canción para crear un pequeno vídeo musical centrado no horto. Estade moi atentos porque dentro duns días estará dispoñible na web do colexio. E lembrade, a paz celébrase todos os días do ano!

 Cultiva la paz 2

Caxoto e os seus contos.

Onte, día 18 de decembro, contamos coa presenza do contacontos Caxoto, que xa é todo un clásico no noso colexio. Nesta ocasión amenizounos cun conto cheo de personaxes coñecidos; "Carapuchiña Vermella", os "Tres Porquiños", "Os Sete Cabritiños", o "Lobo Feroz".... un conto de medo que daba moita risa e que sobre todo sorprendeunos cun final do máis inesperado. Pero os contos, ademais de resultar entretidos, tamén son moi formativos, e Caxoto falounos dun tema moi importante como é a violencia de xénero e o papel da muller nos contos tradicionais. Para terminar a actividade Caxoto organizou un rap no que involucrou a todo o alumnado. Esta vez o importante non eran as rimas, senón o contido da canción e a defensa da igualdade en todos os ámbitos, tanto dentro como fóra dos contos. Desde aquí queremos agradecer a visita do noso amigo contacontos e esperamos velo de novo moi pronto. 

 

Nós reciclamos, e ti?

Esta semana remaotu o cume do clima organizada pola ONU e celebrada en Madrid. Para decepción de moitos, non se chegou ao gran acordo polo clima que se esperaba. Por iso é importante que todas e todos colaboremos na protección do noso planeta, xa que todo xesto conta. Desde o CEIP Francisco López Estrada levamos a cabo unha serie de accións neste sentido que esperemos se prolonguen non só durante este curso, senón que perdure como un bo hábito do noso alumnado.

Un dos primeiros pasos que demos foi a incorporación de distintos recolectores repartidos por todo o colexio para separar e clasificar axeitadamente os residuos. Até os máis pequenos lévano a cabo con gran eficiencia. 

Algúns residuos como os bolígrafos necesitan un colector especial. É moi importante separar axeitadamente cada refugallo para que o seu procesamento sexa moito máis rápido e eficaz. 

Aínda que o alumnado é moi responsable e está a realizar a reciclaxe con moita eficiencia, necesitamos mellorar a redución de residuos. O recolector de envases énchese cada día con moitos envoltorios da merenda. Para evitar, ou polo menos para reducir ese problema, inscribímonos no seguinte programa "Recreos Residuos Cero".

Este programa, organizado por "Teachers for Future Spain", ten como obxectivo motivar ao alumnado para que nos seus xantares e merendas non haxa ningún residuo, ou que sexa o mínimo posible. 

Para tal fin contamos coa axuda de Chip, que nunha serie de sinxelos pasos indícanos como organizar as nosas merendas para que sexan respectuosas co medio ambiente. Medidas tales como traer froita, usar unha cantimplora para a bebida ou meter a merenda nun recipiente reutilizable evitan toda esta acumulación de residuos.

Un dos refugallos máis contaminantes e agresivos co medio ambiente son as pilas e baterías que temos na casa. Por iso animámonos a participar no concurso "Pilabot" organizado pola Xunta. Nel prémiase aos colexios que recollan maior cantidade de pilas para o seu posterior tratamento e reciclaxe. Tamén queremos aproveitar, especialmente agora que se achegan estas datas do Nadal, para recomendar o uso de pilas recargables, que son moito máis respectuosas coa nosa contorna e economía. Grazas a todas e todos por colaborar e por coidar o noso planeta. 

Notificación sobre a reciclaxe

Notificación sobre recreos resíduos cero

Notificación sobre proxecto Pilabot

Notificación sobre a reciclaxe de tapóns

Coidamos o noso horto.

No CEIP Francisco López Estrada estamos a traballar nun proxecto integral do medio ambiente, que ademais de tratar temas sobre redución e clasificación de residuos, ecoloxía, cambio climático, conservación da nosa contorna, etc... tamén traballamos a agricultura ecolóxica a través dun horto escolar. 

Todo o proceso comeza na aula cun sementeiro que os propios alumnos encárganse de elaborar e manter. Todas as plantas son de tempada e a finalidade é que se desenvolvan no horto exterior.

As alumnas e alumnos aprenden a cumprir coas necesidades das plantas, réganas cando é necesario e miran que vaian evolucionando axeitadamente. Unha vez alcanzan o tamaño necesario procédese co seu plantado. 

Todo o alumnado disfruta moito da actividade, especialmente os máis pequenos que se sorprenden co crecemento dalgunhas plantas, neste caso un allo ben fermoso.

Algúns alumnos dan os seus primeiros pasos no coidado das plantas. Poñen toda a súa concentración e esforzo, aínda que manexar a terra entraña certas dificultades para eles. 

As actividades ao aire libre son as favoritas do alumnado. Mostran moito interese e Encarna comparte con todos nós o seu bo facer no horto.

Alumnas e alumnos empregan diferentes ferramentas para traballar a terra e manter o horto nas mellores condicións. Hai que destacar que a algúns se lles dá especialmente ben, como neste caso Uxía, que demostrou ser toda unha experta.

Incluso as tarefas máis delicadas como transplantar as hortalizas do sementeiro lévanas a cabo con gran éxito. Este ano imos ter unha moi boa colleita. Segundo avance o proxecto irémosvos informando na web. Tamén podedes consultar as fotos da actividade na galería. 

Fotos do noso horto

Distribuir contido