Celebramos o Magosto

O día 30 de outubro celebramos no CEIP Francisco López Estrada o Magosto. Ao longo da semana o alumnado foi traendo unhas cabazas moi orixinais e terroríficas que xuntamos nunha exposición. 

Ademais este ano as nenas e nenos viñeron disfrazados para a ocasión: sangue, feridas, cicatrices, caras pálidas... Destacou a gran variedade e orixinalidade dos disfraces. Algunhas mestras tamén trouxeron as súas mellores galas.

A primeira actividade da mañá foi protagonizada pola Bruxa Esdrúxula. Encargouse de recoller os medos que cada alumno previamente escribira nun papel e procedeu a queimalos. Medo ás matemáticas? Queimado! Medo ás verduras do comedor? Queimado! Medo a esquecerse dos deberes? Queimado!

A bruxa Esdrúxula encargouse de queimar os medos, iso si, nada de maxia, un simple chisqueiro acorde aos nosos tempos. 

Despois de queimar os medos relaxámonos un pouco co grupo Odaiko, que nos amenizou a xornada cunha serie de contos... aínda que moi relaxados non quedamos xa que eran auténticos contos de medo!

E pola tarde, mantendo a tradición, pasamos un bo intre cuns xogos populares variados e para todos os gustos. Os máis pequenos portáronse moi ben e pasárono estupendamente. 

Os máis maiores tomárono moi en serio e participaron dunha competición sa e deportiva. 

Os zancos sempre son un reto. Fixérono moi ben, demostraron unha gran habilidade e alegrámonos moito de que ningún nocello resultase prexudicado.

Tamén houbo momentos para descansar. Non todo vai ser emoción e aventuras, o corpo ademais necesita recuperarse, especialmente o dos máis pequenos.

As familias trouxeron unhas sobremesas deliciosas con produtos de tempada. Cada ano supéranse. Nin en MasterChef teñen tanto nivel!

As nenas e os nenos elixiron as súas sobremesas favoritas e probaron uns alimentos tradicionais que non só eran saudables senón tamén deliciosos.

A continuación tedes todas as imaxes da celebración na siguinte ligazón: magosto

Inauguración da biblioteca no curso escolar 2019/20

O pasado 24, coincidindo co Día Internacional da Biblioteca, celebramos a súa inauguración no CEIP Francisco López Estrada. Tivemos un invitado moi especial, o Sr. Raqueto, encargado de cortar a cinta inaugural e de amenizar a actividade.

Todas as nenas e nenos estiveron moi atentos ás indicacións de uso da biblioteca. Explicóuselles cales son as diferentes seccións, os códigos de cores, o uso dos marcadores e como realizar correctamente os préstamos. 

Ademais das explicacións, proxectóuselles un vídeo no que Chip nos falou do Día Internacional da Biblioteca.  

Ademais Chip presentouse e falounos de todos os proxectos que nos vai a propor este ano. Esperemos velo con frecuencia e que nos manteña informados de todas as actividades que se leven a cabo dende a biblioteca e dende o horto. 

Creamos un composteiro.

O pasado 25 de outubro demos o primeiro paso nun proxecto que iremos desenvolvendo durante todo este curso. O horto escolar, que está pensado como actividade principal de moitas outras que teñen como fin conectar ao alumnado co medio ambiente, o seu coidado e conservación, ocupou a última sesión da xornada. Nela, alumnas e alumnos iniciaron a actividade de compostaxe, na que eles mesmos foron encargados de colleitar o material orgánico necesario para a súa creación. Dende os alumnos/as máis pequenos ata os máis grandes mobilizáronse para achegar materia orgánica ao composteiro, dando así inicio a unha actividade que ademais de ensinarnos a importancia de clasificar os residuos, axudaranos a conseguir os mellores resultados no horto escolar. Foi a primeira de moitas outras xornadas que pasaremos en contacto co horto, a natureza e o medio que nos rodea.

As alumnas e alumnos axudáronse de diferentes ferramentas para colleitar follas e pequenas ramas.

Os máis pequenos recibiron a axuda dos máis maiores en todo momento.

A colaboración entre todos axudou a que a actividade fose todo un éxito.

Todo o alumnado participou con moito interese e ademais de lograr un proxecto en común tamén o pasaron en grande.

O momento de maior satisfacción é cando ves a cantidade de materia orgánica que estás a achegar ao composteiro. Todo ese esforzo moi pronto dará resultados. Esperamos compartilo moi pronto con todos vós!

Ligazón a tódalas fotos na galería

Proxecto Erasmus+ no CEIP Francisco López Estrada

O CEIP Francisco López Estrada en Colaboración co CFR de Ferrol desenvolveu un programa de inmersión e formación do profesorado na rede do sistema educativo "Erasmus+". Este plan ten como finalidade ampliar os coñecementos do profesorado no ámbito europeo, conectándoo con outras escolas e realidades que achegan ferramentas de traballo innovadoras e xenera novas visións dentro da comunidade educativa. 

En representación do noso colexio foron as profesoras Cristina Iglesias e Carmen García, que previamente asistiron a un curso de perfeccionamento e inmersión da lingua inglesa para poder desenvolver o proxecto nas mellores condicións posibles. 

A experiencia formativa do Erasmus+ componse dunha serie de apartados complementarios. Un dos máis importantes é a formación e perfeccionamento do profesorado na lingua inglesa. Na foto superior vemos reunidos a todos os profesores que participaron, entre eles Cristina e Carmen. 

A segunda liña de traballo do Erasmus+ desenvólvese directamente nos centros educativos da cidade anfitrioa, neste caso diferentes colexios e escolas da área de Cardiff. Estas visitas son unha gran fonte de recursos e ideas para o desenvolvemento de diferentes actividades na nosa escola. O acceso a diferentes metodoloxías, sistemas de traballo, murais, exposicións, plans pedagóxicos, etc... achégase aos colexios de orixe para que se implanten nas diferentes áreas, mellorando e repercutindo na calidade da nosa educación.

Os murais son unha gran fonte de inspiración, xa que recollen metodoloxías e proxectos levados a cabo nos centros de Cardiff. 

Os recursos abarcan todas as áreas, tamén a de plástica. Os traballos realizados polo alumnado de Cardiff son dunha gran calidade.

 

Ademais da formación e as visitas aos colexios, outra parte importante do proxecto Erasmus+ é a inmersión na sociedade e cultura do país anfitrión. Nas horas libres e de lecer as nosas dúas profesoras percorreron as rúas de Cardiff e disfrutaron de diferentes visitas culturais.

O castelo no centro da cidade é un punto de referencia imprescindible. 

A Baía de Cardiff, que é a zona de restauración da cidade, presenta unha oferta gastronómica de ámbito internacional.

O edificio Pierhead, un dos máis emblemáticos da baía.

A participación nos plans europeos de formación do profesorado supón unha mellora na calidade de ensino dos nosos centros, ademais dunha experiencia persoal de gran valor. Desde o CEIP Francisco López Estrada agradecémoslle ás profesoras Carmen e Cristina a súa boa disposición para participar no Erasmus+, así como ao CFR de Ferrol por facilitarnos esta experiencia formativa.

 

 

Día 8 de marzo

Día internacional da muller

Neste día no noso cole tivemos a visita de dúas mariscadoras e unha mariñeira redeira do concello de Mañón que nos achegaron un pouco ao seu traballo e nos ensinaron a arte de mariscar e de traballar no mar. 

Isabel e Silvia Álvarez, as mariscadoras, amosáronos un montón de aparellos que utilizan na recolleita da ostra, da ameixa e tamén, fai uns anos, na coquina. Explicaron ademais aos nosos nenos e nenas as técnicas empregadas.  

Luisa falounos da súa experiencia como mariñeira e amosou diferentes artes de pesca levadas a cabo polos mariñeiros/as do noso concello. Tamén nos indicou como se repara unha rede e os distintos tipos de redes cos que ela traballa.

Mulleres traballando na Ría do Barqueiro

Estes son os aparellos e tamén algúns mariscos dos que colleitan e recollen nas nosas praias e na nosa ría.  

No seguinte vídeo amosamos os debuxos que fixeron os nenos/as de infantil sobre a charla que escoitaron destas artes de pesca e marisqueo e tamén o traballo que fixeron os nenos/as de primaria para ampliar a cantidade de traballos que as mulleres deste concello están a realizar.  

Moitas grazas a Luisa, Isabel e Silvia pola súa colaboración. 

 

Admisión de alumnado 2019/2020

LISTAXE DEFINITIVA DE ADMISIÓN DE ALUMNADO PARA O CURSO 2019-2020

CEIP Francisco López Estrada

Teléfono: 981414127

Enderezo electrónico: ceip.lopez.estrada@edu.xunta.gal

O Porto do Barqueiro - 15337 Mañón , A Coruña

 

                4º Educación infantil 

APELIDOS E NOME ADMITIDO/A
1 GÓMEZ ÁLVAREZ, JULIA SI
2 GÓMEZ BALTAR, MIGUEL SI
3 PORTAL ÁLVAREZ, DÍDAC SI
4 RIVERA PEGUEIRO, KILIAM JOSÉ SI
5 RODRÍGUEZ FERNÁNDEZ, HUGO SI
6 RODRÍGUEZ LOZANO, SERGIO SI

 

 

 

 

Distribuir contido