Reapertura da Biblioteca Municipal do Barqueiro

Caxoto1

A semana pasada o CEIP Francisco López Estrada foi convidado por parte do Concello de Mañón á reapertura da biblioteca municipal. Para celebrar o devandito evento contamos coa presenza do noso amigo Caxoto, que unha vez máis nos amenizou a xornada cunha estupenda selección de contos fantásticos e sobre todo co seu gran sentido do humor. Tanto pequenos como adultos pasámolo estupendamente e regresamos ao colexio con moitas ganas de volver visitar a biblioteca e de ler unha chea de libros. Queremos agradecer ao concello esta invitación así como a Caxoto polo seu bo facer e o seu gran sentido do humor. Pola nosa banda comprometémonos a ler moitos libros e visitar frecuentemente a biblioteca. 

Caxoto 2

Celebramos o día da paz - 30 de xaneiro

Cultiva la paz

A semana pasada celebramos no CEIP Francisco López Estrada o día da Paz (30 de xaneiro). Aproveitando que este ano estamos centrados no proxecto do horto escolar e do coidado da nosa contorna, eliximos unha canción moi apropiada "Cultiva la paz". Ademais de sensibilizarnos respecto da importancia de vivir nunha sociedade pacífica e sen conflitos, aproveitamos a canción para crear un pequeno vídeo musical centrado no horto. Estade moi atentos porque dentro duns días estará dispoñible na web do colexio. E lembrade, a paz celébrase todos os días do ano!

 Cultiva la paz 2

Lecturas para o Nadal

Por fin chegaron as vacacións, época de descanso, de reunións familiares, sobremesas do Nadal, agasallos e tempo de lecer. Desde o CEIP Francisco López Estrada desexamos que pasedes unhas moi felices festas e tamén aproveitamos para recomendar ao noso alumnado unha serie de lecturas. Deixámosvos a continuación a ligazón.

Lecturas para o Nadal

Caxoto e os seus contos.

Onte, día 18 de decembro, contamos coa presenza do contacontos Caxoto, que xa é todo un clásico no noso colexio. Nesta ocasión amenizounos cun conto cheo de personaxes coñecidos; "Carapuchiña Vermella", os "Tres Porquiños", "Os Sete Cabritiños", o "Lobo Feroz".... un conto de medo que daba moita risa e que sobre todo sorprendeunos cun final do máis inesperado. Pero os contos, ademais de resultar entretidos, tamén son moi formativos, e Caxoto falounos dun tema moi importante como é a violencia de xénero e o papel da muller nos contos tradicionais. Para terminar a actividade Caxoto organizou un rap no que involucrou a todo o alumnado. Esta vez o importante non eran as rimas, senón o contido da canción e a defensa da igualdade en todos os ámbitos, tanto dentro como fóra dos contos. Desde aquí queremos agradecer a visita do noso amigo contacontos e esperamos velo de novo moi pronto. 

 

Nós reciclamos, e ti?

Esta semana remaotu o cume do clima organizada pola ONU e celebrada en Madrid. Para decepción de moitos, non se chegou ao gran acordo polo clima que se esperaba. Por iso é importante que todas e todos colaboremos na protección do noso planeta, xa que todo xesto conta. Desde o CEIP Francisco López Estrada levamos a cabo unha serie de accións neste sentido que esperemos se prolonguen non só durante este curso, senón que perdure como un bo hábito do noso alumnado.

Un dos primeiros pasos que demos foi a incorporación de distintos recolectores repartidos por todo o colexio para separar e clasificar axeitadamente os residuos. Até os máis pequenos lévano a cabo con gran eficiencia. 

Algúns residuos como os bolígrafos necesitan un colector especial. É moi importante separar axeitadamente cada refugallo para que o seu procesamento sexa moito máis rápido e eficaz. 

Aínda que o alumnado é moi responsable e está a realizar a reciclaxe con moita eficiencia, necesitamos mellorar a redución de residuos. O recolector de envases énchese cada día con moitos envoltorios da merenda. Para evitar, ou polo menos para reducir ese problema, inscribímonos no seguinte programa "Recreos Residuos Cero".

Este programa, organizado por "Teachers for Future Spain", ten como obxectivo motivar ao alumnado para que nos seus xantares e merendas non haxa ningún residuo, ou que sexa o mínimo posible. 

Para tal fin contamos coa axuda de Chip, que nunha serie de sinxelos pasos indícanos como organizar as nosas merendas para que sexan respectuosas co medio ambiente. Medidas tales como traer froita, usar unha cantimplora para a bebida ou meter a merenda nun recipiente reutilizable evitan toda esta acumulación de residuos.

Un dos refugallos máis contaminantes e agresivos co medio ambiente son as pilas e baterías que temos na casa. Por iso animámonos a participar no concurso "Pilabot" organizado pola Xunta. Nel prémiase aos colexios que recollan maior cantidade de pilas para o seu posterior tratamento e reciclaxe. Tamén queremos aproveitar, especialmente agora que se achegan estas datas do Nadal, para recomendar o uso de pilas recargables, que son moito máis respectuosas coa nosa contorna e economía. Grazas a todas e todos por colaborar e por coidar o noso planeta. 

Notificación sobre a reciclaxe

Notificación sobre recreos resíduos cero

Notificación sobre proxecto Pilabot

Notificación sobre a reciclaxe de tapóns

Coidamos o noso horto.

No CEIP Francisco López Estrada estamos a traballar nun proxecto integral do medio ambiente, que ademais de tratar temas sobre redución e clasificación de residuos, ecoloxía, cambio climático, conservación da nosa contorna, etc... tamén traballamos a agricultura ecolóxica a través dun horto escolar. 

Todo o proceso comeza na aula cun sementeiro que os propios alumnos encárganse de elaborar e manter. Todas as plantas son de tempada e a finalidade é que se desenvolvan no horto exterior.

As alumnas e alumnos aprenden a cumprir coas necesidades das plantas, réganas cando é necesario e miran que vaian evolucionando axeitadamente. Unha vez alcanzan o tamaño necesario procédese co seu plantado. 

Todo o alumnado disfruta moito da actividade, especialmente os máis pequenos que se sorprenden co crecemento dalgunhas plantas, neste caso un allo ben fermoso.

Algúns alumnos dan os seus primeiros pasos no coidado das plantas. Poñen toda a súa concentración e esforzo, aínda que manexar a terra entraña certas dificultades para eles. 

As actividades ao aire libre son as favoritas do alumnado. Mostran moito interese e Encarna comparte con todos nós o seu bo facer no horto.

Alumnas e alumnos empregan diferentes ferramentas para traballar a terra e manter o horto nas mellores condicións. Hai que destacar que a algúns se lles dá especialmente ben, como neste caso Uxía, que demostrou ser toda unha experta.

Incluso as tarefas máis delicadas como transplantar as hortalizas do sementeiro lévanas a cabo con gran éxito. Este ano imos ter unha moi boa colleita. Segundo avance o proxecto irémosvos informando na web. Tamén podedes consultar as fotos da actividade na galería. 

Fotos do noso horto

LIPDUB - Día internacional en contra da violencia de xénero.

No CEIP Franciso López Estrada celebramos o Día Internacional contra a violencia de xénero ao grande. Para unha ocasión tan importante e reivindicativa decoramos o centro con debuxos, carteis e mensaxes en clara oposición á violencia de xénero. Ademais tamén gravamos un lipdub baseado na canción de Rozalén - "A porta violeta". Todo o alumnado involucrouse moitísimo coa gravación e puxeron todas as súas ganas e o seu mellor facer nela. Esperamos que vos guste. 

  

 

 

Exhibición da Garda Civil na Barqueira.

O día 15 de novembro o alumnado do CEIP Francisco López Estrada foi convidado a participar na exhibición que organizou a garda civil no colexio da Barqueira. As nenas e os nenos puideron disfrutar do trato directo cos profesionais que coidan e vixían da nosa seguridade, coñecendo deste xeito mellor a súa labor profesional e o equipamento do que dispoñen.

A primeira exhibición foi protagonizada por un pequeno amigo que entusiasmou a todos co seu bo facer e a súa simpatía. Un can perfectamente adestrado encargouse de localizar unha sustancia explosiva (simulada) escondida na pista. A pesar da presenza do alumnado e do ruído o noso amigo foi capaz de atopar o seu obxectivo deixando a todos sorprendidos e gañándose un gran aplauso. 

Ademais do aplauso e a aprobación do público tamén se gañou unhas boas caricias.

Un dos puntos con máis aceptación da exhibición foi a moto do SEPRONA. Todos querían subirse a ela e fixérono amosando o seu mellor sorriso. 

Outros dirixíronse aos vehículos de catros rodas. Neles puideron poñerse ao volante, facer soar o claxon, acender as luces, usar as sirenas e mesmo dar algunha que outra mensaxe polo megáfono. 

Ademais a garda civil tivo a amabilidade de deixarnos probar parte do seu equipo técnico. Os prismáticos de visión nocturna espertaron a curiosidade e admiración das nenas e dos nenos. Seguro que o material mostrado axudaríanos moito aos mestres con algún que outro patio de recreo. 

E como acto final recibimos a visita dun helicóptero da garda civil. O alumnado puido ver o vehículo e charlar co piloto, que atendeu as nosas dúbidas e preguntas. Foi unha xornada amena e interesante, que nos achegou a un sector profesional imprescindible para a nosa vida en sociedade e que moitas veces é un gran descoñecido. Desde aquí agradecémoslle á garda civil a súa disposición, paciencia e tempo compartido connosco. 

Podedes atopar as fotos da xornada na seguite ligazón:

Fotos da galería

Celebramos o día da infancia - 20 de novembro

O pasado xoves 20 de novembro celebramos o día da infancia no CEIP Francisco López Estrada. Todo o alumnado reuniuse na biblioteca para facer unha posta en común sobre os dereitos das nenas e dos nenos. 

 

Por parellas foron presentando os distintos dereitos, acompañando cada un dunha ilustración, un texto e un exemplo.

As compañeiras e compañeiros estiveron moi atentos á lectura dos dereitos que previamente foron traballados e comentados na clase, concienciándose da necesidade de respectalos e mantelos.

Unha aperta foi a mellor maneira de rematar a lectura dos dereitos, símbolo de entendemento e concordia entre todas e todos.

Visitamos o Museo do Mar do Barqueiro

O día 8 de novembro o alumnado do CEIP Francisco López Estrada visitou o Museo do Mar do Barqueiro. Creado como iniciativa privada e grazas ás doazóns das xentes da comarca, conta cunha gran cantidade de inventario entre o cal destacan ferramentas, redes, animais mariños, maquinaria, fotografías, bandeiras e moitos recursos máis. Tamén sorprende a capacidade de inmersión no mundo mariñeiro que acada o museo grazas a súa excelente ambientación, que coida ata os máis mínimos detalles de cada recuncho.

A nosa directora Encarna explicou e introduciu ao alumnado no fascinante mundo do mar e da pesca. Guiou e espertou o interese das nenas e dos nenos nos distintos apartados e contidos do museo e respondeu as dúbidas que foron xurdindo.

Os máis pequenos descubriron antigas técnicas e ferramentas que se usaban tradicionalmente e que agora forman parte da nosa historia e dos nosos recordos. Estiveron atentos a todo, e as súas miradas ían constantemente dun obxecto a outro, cada cal máis rechamante e misterioso.

Os maiores tamén se sorprenderon coa gran cantidade de obxectos que ten o museo, admiraron o seu valor histórico e expuxeron moitas dúbidas sobre os seus posibles usos, xa que as novas xeracións están máis afeitas aos móbiles e as tablets que ás antigas ferramentas de pesca.

O alumnado quedou entusiasmado con esta  xoia que temos no Barqueiro e que puidemos visitar durante toda a mañá nunha serie de quendas. Dende o CEIP Francisco López Estrada estamos moi agradecidos por esa oportunidade que nos foi ofertada por Daniel Béaz, o dono do museo. Tamén queremos darlle as grazas á súa familia Irene e Charo, así como a Bea Díaz polo seu tempo, colaboración e toda a axuda prestada nesa xornada.

Podedes atopar o resto das fotos na galería do colexio na seguiente ligazón:

Fotos da visita ao Museo do Mar

Distribuir contido