Articles

Estimadas familias: Hoxe tivo lugar a estrea do documental "Coa terra nas mans" (elaborado pola produtora Tex 45 coa colaboración do Concello de Coristanco e a Deputación da Coruña) que se centra no cultivo da pataca, na importancia que tivo para a poboación do Concello de Coristanco e na grande repercusión que acabou obtendo as características deste tubérculo tan habitual na nosa vida diaria. A pataca contribuíu a mellorar a calidade de vida de moitas familias da comarca que fai moitos anos tiñan como principal fonte de ingresos o froito do seu traballo co gando e a agricultura. A día de hoxe a pataca de Coristanco ten un recoñecido prestixio polo seu sabor único e característico e a súa propia festa no mes de setembro. Para poder ver o documental completo e outros materiais só necesitades acceder á páxina: www.coaterranasmans.com. Un saúdo. O equipo directivo. 

Estimadas familias: A produtora de televisión Tex45 Producións está a desenvolver un documental chamado "Coa terra nas mans" sobre a pataca de Cosirtanco, en colaboración co Concello de Coristanco e a Deputación da Coruña. Todas aquelas familias que estean interesadas en colaborar co documental poderán facelo de distintos xeitos e achegando diferentes tipos de documentos: fotos antigas da vida no rural e da "Festa da Pataca", ilustracións creativas sobre o "Mundo da pataca", textos explicativos relacionados co tubérculo, os traballos que leva consigo o seu cultivo, se nos domicilios do alumnado ou familiares se dedican a cultivar a pataca, debuxos sobre o traballo no rural e as súas peculiariedades e costumes... Textos que recollan lembranzas curiosas sobre a pataca, a súa festa conmemorativa, as posibilidades que ofrece o tubérculo para formar parte de infinitos pratos que forman parte do menú habitual de moitos galegos e galegas e, por suposto, dos visitantes que se achegan a Galicia a degustar os exquisitos pratos cos que nos agasallan os numerosos locais dedicados á gastronomía que se espallan por todo o territorio.

Estimadas familias: A Consellería de Cultura, Educación, Formación Profesioanl e Universidades publicou no DOGA nº 196, do venres 14 de outubro de 2022 a Resolución do 5 de outubro de 2022 de concesión directa da ampliación da axuda para adquirir material escolar, regulada na Orde de 29 de abril de 2022. Podedes consultar o documento completo no adxunto. Para poder retirar os vales das axudas é necesario que se persoen no colexio os pais/nais/titores dos/das alumnos/as beneficiarios/as e no caso de non poder vir ningún dos proxenitores poderán autorizar a outra persoa indicando no texto da autorización que debe entregar no centro: o nome completo, o DNI e a relación coa persoa autorizada. Os vales para material entregaranse nas horas de atención ao público de Xefatura e de Secretaría. Seguindo as instrucións da Consellería NON se emitirán duplicados dos vales e deberán ser empregados, preferentemente, antes do 1 de decembro de 2022. Un saúdo. O equipo directivo. 

Estimadas familias: A Asociación Vieiro pon en marcha, un curso máis, dentro do programa de Prevención no ámbito familiar, o programa “Pais e Nais no océano educativo” destinado a pais, nais e persoas con responsabilidade familiar, que desexen informarse á hora de desempeñar a súa labor como educadores/as. É un programa gratuíto ao que podedes acceder previa inscrición e que está impartido por educadoras e psicólogas de Vieiro que buscarán dar as ferramentas axeitadas. Dispoñedes de máis información no documento adxunto. Un saúdo. O equipo directivo. 

Estimadas familias: No calendario escolar que figura publicado nesta web con data 6 de xuño de 2022 podedes acceder á información relativa aos períodos de vacacións e días non lectivos deste curso 2022-2023. A continuación indicamos un pequeno resumo:

Período de vacacións de Nadal: do 23 de decembro ao 6 de xaneiro, ambos inclusive.

Período de vacacións de Entroido: 20,21 e 22 de febreiro.

Período de vacacións de Semana Santa:  do 3 ao 10 de abril, ambos inclusive.

Festivos locais do Concello de Coristanco para o ano 2023: martes de entroido (día 21 de febreiro) e venres, 19 de maio.

Día do ensino a nivel autonómico coa consideración de non lectivo: 31 de outubro.

Estimadas familias: A entrega de libros de Fondolibros a aquelas familias que lles corresponde ser beneficiarias do programa realizarase este mércores, día 7 de setembro de 10:30hs a 13:00hs. Aquelas familias que aínda non recolleran os cheques de axudas para libros e/ou material poderán facelo en conserxería nese mesmo tramo horario. Un saúdo. O equipo directivo.

Estimadas familias: A entrega de libros a aquelas familias ás que lles corresponde que o centro educativo lle preste os libros de texto farase tan pronto dispoñamos de todos os libros no colexio. Estamos á espera de que as editoriais proporcionen todos os libros que se mercaron pero, de momento non foi posible rematar de preparar os lotes de libros para que poidades pasar polo centro a recollelos. No momento no que teñamos todo listo para realizar a entrega, informaremos a través da páxina web o día e o horario no que se vai poder asistir ao centro para a recollida. Un saúdo. O equipo directivo.