O período de adaptación é o conxunto de fases polas que pasan as nenas e nenos para adaptarse á nova situación escolar que non é coñecido nin habitual. Debemos planificar este período de adaptación tal e como se establece na lexislación polo que adaptaremos o horario do alumnado e tamén o tipo de actividades. De ser necesario, adaptaríanse os agrupamentos.
Así, o horario do alumnado que se incorpore por primeira vez ao centro educativo será moi reducido (30 minutos aproximadamente) para ir ampliándose progresivamente ao longo dos días ata chegar a completar as 5 horas lectivas.
En canto ás actividades do período de adaptación serán fundamentalmente lúdicas, baseadas na presentación de compañeiros/as, mestres/as e persoal non docente; no coñecemento de espazos de aula e de centro (interiores e exteriores); no uso de materiais de aula e xoguetes; aprendizaxe de rutinas básicas tales como chegada, tarefas de encargado/a, asemblea, hora de ler, hixiene e merenda, saída... e outras actividades planificadas pola titora.
É primordial que os pais e nais colaboren na adaptación dos seus fillos e fillas. Para conseguir isto é importante que as nenas e nenos estean acostumados a realizar unha serie de tarefas na casa que impliquen unha autonomía nas áreas para evitar unha gran diferenza entre a casa e a escola e tamén para apoiar a labor docente. Por esta razón as nais e pais deben realizar na casa as seguintes actividades e así potenciar as diferentes áreas de desenvolvemento.
Área da linguaxe:
-Falar co/a neno/a sobre aspectos da súa vida cotiá.
-Cando está xogando que nos exprese a que xoga, con que xoga…
-Dicir as palabras cunha pronunciación o máis correcta posible.
-Non entenderlle todo, as nenas e nenos deben esforzarse por falar ben.
Área de hábitos e autonomía:
-Vestirse e desvestirse: deben ir colaborando na medida das súas posibilidades. É esencial que saiban subir e baixar, e sacar e poñer a súa roupa.
-O baño: dende os 3 anos poden ir ao baño por si mesmos, cando teña ganas, sen necesidade de que sempre o acompañe un adulto. Deben aprender a usar correctamente o papel hixiénico. Por suposto, este verán é o momento idóneo para deixar o pañal se aínda non o fixeron.
-Xogo: dedicar un cachiño cada día para xogar cos vosos fillos e fillas, que non o fagan sempre sos. Cando rematen, que recollan eles, non vós.
-Biberón e chupete: son un inconveniente para o bo desenvolvemento dental, afectivo, lingúístico e social. É importante que se aínda os seguen usando que os deixen totalmente.
-Descanso: os nenos e nenas necesitan descansar o suficiente e deben ter sempre o mesmo horario para deitarse e espertar. É aconsellable durmir unha sesta de media hora.
-Lavado de mans: ensinádelle a usar correctamente o xabón, a lavar moi ben as mans e a secalas correctamente.
-Aprender a sonarse sos: empregando correctamente os panos de papel. Recordarlle que unha vez usados deberán tiralos na papeleira.
-Comida: probar diferentes alimentos e ensinarlle a abrir unha botella de auga e unha fiambreira.
Tamén é importante saber abrir e pechar a mochila.
Pensade que todos estes hábitos son moi recomendables sempre e sobre todo coa situación actual derivada da COVID-19.
OUTRAS SUXERENCIAS:
Ø
Creade actitudes positivas respecto ao colexio: comentádelle as vosas fillas e fillos o que hai na escola, as actividades que van a realizar, os nenos e nenas cos que van a xogar, os materiais, os xoguetes que van a atopar… E sempre destacade o positivo!
Se seguides estas recomendacións no verán seguro que o período de adaptación dos vosos fillos e fillas se facilita moito.
Moitas grazas pola vosa colaboración e bo verán!
A titora de Educación Infantil
