Skip to Content

Colectivas

Máis suxestións para estes días

Estimadas familias:


Seguimos a ter que permanecer na casa uns días máis. Menos mal que agora os rapaces poden sobrelevar algo  mellor a situación, saíndo á rúa un curto periodo de tempo, o que, sen dúbida, axudará a romper a sensación de illamento e a falla de contacto referencial cos seus iguais. Explicádelles ben cales son as condicións desa saída, para evitar que sufran as expectativas que poideran  ter, e respondede ás súas preguntas de maneira clara, sinxela e certa.


Sabemos, porque así nolo facedes chegar, que ás veces empeza a haber certas dificultades en relación á realización das actividades que marcan os profes, sobre todo nalgúns alumnos/as  máis novos/as, aparecendo actitudes de rexeitamento á realización de ditas tarefas escolares, irritabilidade, falta de concentración... Mantede a calma, para poder trasmitir esa calma aos rapaces. As propostas do cole pretenden reforzar as aprendizaxes adquiridas e manter unhas rutinas de traballo e conexión co que sería a súa actividade diaria normal. Pero non pasa nada se algún día esas tarefas se reducen, ou se necesitamos facer unha pausa, para que os nenos/as podan dar saída a ese cúmulo de emocións que, a maioría das veces, non son quen de identificar nin  de expresar con palabras.


Respectade eses momentos. E aproveitade actividades "de ocio" ou máis lúdicas (debuxos, invención de historias e/ou contos....) para que podan verbalizar esas emocións. Sen críticas. Sen minusvaloracións. Facéndolles sentir que, aínda que as circunstancias mudaran, aínda que agora traballen na casa con papá ou mamá, aínda que ás veces papá ou mamá estean preocupados... eles seguen sendo moi importantes. O máis importante.


Non dubidedes en seguir trasmitíndonos as dificultades ou inquedanzas do voso día a día (lembrade que podedes contactar a través do correo electrónico do centro ou a través dos titores/as dos vosos fillos/as). Tentaremos axudarvos.

Moito ánimo! Vai quedando menos....

A Orientadora.

Día do Autismo: 2 de abril de 2020

Moitas grazas a todos os nenos e nenas de 1º. Un gran traballo en equipo!!

Suxestións para estes días

Estimadas familias:

Levamos xa uns días desenvolvendo unha forma de traballo nova tanto para vós e os vosos fillos/as, coma para nós, o profesorado.

Ante a necesidade de permanencia na casa, dadas as actuais circunstancias coñecidas xa por todos, pasamos a comentarvos unha serie de recomendacións, suxeridas pola Orientadora, que pensamos poden axudarvos a manter as rutinas concernientes á vida diaria escolar:

- Procurade, na medida do posible, manter os horarios (hora de levantarse, deitarse, hora de xantar...)

- Do mesmo xeito, procurade que as actividades escolares que os mestres/as están enviando, se fagan no horario de mañá e mesmo se fose posible, tendo diante o horario lectivo que correspondería a ese día. Acompañade aos alumnos ao inicio delas e facédelles ver que as tarefas son a súa responsabilidade e deben cumprir con ela (en alumnos de Primaria).

- A metade da mañá, por suposto, deben facer un pequeno descanso.

- A partir do xantar, o tempo de lecer xa é para disfrute persoal.

Respectade as súas afeccións, pero, tendo en conta que precisan do ordenador para as tarefas escolares, procurade que nas tardes non haxa excesiva dependencia del nin doutras pantallas (tabletas, tv...) e, en todo caso, facendo os descansos suficientes que permitan alixeirar a carga de exposición a elas.  Debuxos, confección de pequenos murais, contos orais  por parte dos pais para os máis pequenos, puzzles, xogos de adiviñas,  xogos do "vexo vexo", actividades físicas aínda coa limitación de espazo...poden ser exemplos válidos.

Por suposto as fins de semana e os periodos nos que non habería clase serán de "libre disposición".

Esta é unha situación nova para todos. Procuremos poñer o mellor de nós mesmos para poder sobrelevala da mellor maneira posible.

Recibide un cordial saúdo.

A Directora.

CONMEMORACIÓN DIA DA PAZ

Hoxe, 30 de xaneiro celebramos o Día da Paz; nenos e nenas, mestres, mestras, familias, saímos dun mesmo lugar, as nosas escolas, porque como dixo Malala Yousafzai: “Un neno, unha mestra, un libro, un lapis poden cambiar o mundo”.

Nós tamén cremos que non hai mellor menciña contra as guerras, a fame, a desigualdade e a intolerancia que a educación.

Unimos as nosas mans desde o Milenium, erixido para conmemorar o século XXI, un século que queremos sexa de Paz en todo o mundo e, con elas, fixemos unha onda que quere ser océano de ilusión, dun soño posible para todas as persoas de calquera cultura, crenza ou ideas baseadas no respecto, na igualdade e na liberdade.

Das nosas mestras e mestres, esperamos que sementen en nós coñecementos que estimulen preguntas, que nos axuden a formarnos no respecto á diversidade. Dos libros, esperamos que abran portas á reflexión para, con ese lapis, escribir unha historia nova, que como este faro ilumine sendeiros de paz.

 

O artigo décimo da Declaración dos Dereitos da Infancia di:

O dereito para ser criado cun espírito de comprensión, tolerancia, amizade entre os pobos e irmandade universal.

Velaí o camiño cara a Paz.

Moitas grazas as vosas mans cómplices, fortes e decididas que deixamos hoxe como a nosa persoal pegada dun mundo posible, no que tezamos unha rede de afecto e respecto feita cos fíos da paz e a igualdade.

 

Concerto do grupo IAR no Centro

O xoves 21 de novembro o grupo IAR, veu ao noso cole e agasalláronnos cun concerto de "Música tradicional", encantounos a tod@s e estivemos moi participativos.


Carreira "Kilómetros de Solidariedade"

O pasado xoves 5 de decembro celebramos a Carreira "Kilómetros de Solidariedade" aprazada semanas atrás a causa do mal tempo. Todo o alumnado do cole desprazouse ao Parque de Eirís para participar nunha actividade na que todos se esforzaron ao máximo para aportar o seu grao de area. Toda a axuda aportada polos coles participantes nesta XVI edición da carreira organizada Save the Children destinarase a axudar aos nenos e familias da etnia Rohyngia obrigados a abandonar o seu país de orixe, Myanmar, a causa dos conflitos bélicos nesta rexión e ter que vivir en pobres condicións en campos de refuxiados. Queremos agradecer a colaboración de tódolos nenos e familias do cole para facer posible a organización e realización desta actividade.

 

Pintamos NON á violencia de xénero

Apadriñamento lector no Día do Libro

Hoxe o tempo non nos permitiu compartir lecturas na Praza da Concordia como tiñamos previsto, pero non impediu que "padriños" e "afillados" disfrutasemos destes momentos de "lecer lector" en diferentes espazos do noso centro.

 

8 de Marzo de 2019

Día da Paz e da Non Violencia 2019

No seguinte vídeo podedes ver a construcción do mural conxunto para conmemorar o Día da Paz e da Non Violencia 2019.

IMAXINA from BiblioAnxo on Vimeo.

 

Distribuir contido


by Dr. Radut