Voz Natura

COMPOSTAXE NO COLEXIO

O noso centro foi un dos seleccionados para participar nun proxecto pioneiro sobre o aproveitamento dos restos dos alimentos que se consumen no comedor escolar para producir compostaxe. 

No seguinte enlace podedes ler a nova na páxina oficial da Xunta de Galicia: 

Un total de 25 centros escolares participan nun proxecto pioneiro de compostaxe para impulsar a recollida separada da fracción orgánica

 

O pasado 25 de novembro quedaron instalados os composteiros nun recuncho da horta do centro e agora empezaremos co proceso de recollida e acumulación dos residuos nos mesmos para producir compost que empregaremos como fertilizante natural na nosa horta. 

Para saber máis sobre o proceso, premede na seguinte imaxe, no blog de Voz Natura do centro tedes toda a información:

 

TEMOS PATOS NO COLE!!!

TEMOS PATOS NO COLE!! Acabamos de pór en marcha un novo proxecto dentro do programa de VOZ NATURA que levamos a cabo no centro e que se titula: NOS SEUS ZA-PATOS. Trátase dun proxecto de empatía activa, co que pretendemos, en liñas xerais:

  • Conseguir unha zona de relax na nosa escola, na que os cativos se sintan cómodos e tranquilos, observando, alimentando ou xogando  cos patos.
  • Mellorar a autoestima dos nenos dándolles novas responsabilidades.
  • Fomentar a aprendizaxe dinámica e participativa no coidado dos animais.
  • Conectar aos nenos coa natureza a través do coidado dos patos.
  • Ensinar e aprender de maneira activa, por descubrimento, observando, tocando, e investigando.
  • Asimilar valores medio ambientais baseados no respecto aos animais e á natureza
  • Reducir o estres a través do contacto cos animais.
  • Sacar a escola das aulas para deseñar novos espazos de ensinanza e de aprendizaxe.

Despois de prepararlles unha casiña na pequena carballeira que temos no patio do cole, xa temos alí instalados a 5 patiños cos que conviviremos e teremos experiencias ao longo deste curso.

Se queredes ter máis información sobre este proxecto, premede na imaxe e accederedes ao blog de Voz Natura do noso centro. 

 

VOZ NATURA 2019-20

Comezamos o curso e comezamos tamén a nosa participación, un ano máis, no programa de educación medio-ambiental VOZ NATURA, que celebra xa a súa 23ª edición. O lema deste curso é "CONSTRUAMOS UN FUTURO SEN PLÁSTICO":

"O obxectivo principal deste curso é a erradicación dos plásticos de todos os ecosistemas. Os equipos realizan actividades orientadas a reducir a produción e consumo de plásticos, buscando alternativas máis sostibles e respectuosas co medio ambiente. Unha temática coa que Voz Natura quérese sumar ao imparable movemento a nivel mundial para combater os efectos prexudiciais dos plásticos na natureza" (sinopse extraída da páxina oficial de Voz Natura).

O título do noso proxecto é o de DESPLASTIFÍCATE!!! e con el tamén queremos contribuír á redución do consumo de plásticos, na nosa contorna, na escola e nas casas, polo que solicitamos tamén a vosa colaboración.

(Preme na imaxe para descargar a selección de centros participantes)

As actividades que realizaremos ao longo do curso quedarán plasmadas, coma en cursos anteriores,  no noso blog de Voz Natura que, de acordo co novo proxecto, estrea cabeceira:

Premendo na imaxe irás ao noso blog onde xa hai publicadas algunhas ideas para axudarnos a reciclar e reducir o consumo de plásticos.

Tamén vos deixamos un sinxelo cartel publicado por SOGAMA (Sociedade Galega do Medio Ambiente) cuns consellos básicos sobre a redución dos plásticos. ANÍMATE E COLABORA NA PROTECCIÓN DO MEDIO AMBIENTE. DI NON AOS PLÁSTICOS!!.


 

REFORESTACIÓN NO MONTE DE PALMÉS

Os alumnos e alumnas de 6º de Educación Infantil e de 6º de Educación Primaria realizaron o 3 de maio unha saída aos montes de Palmés para realizar unha reforestación en zonas nas que houbera incendios en anos pasados. Para elo contaron coa axuda do axente forestal Pepe Santos, que xa estivera no noso centro falando precisamente dos incendios forestais, como vos contamos no seu día. Pero non só plantaron árbores, fixeron e aprenderon moitas máis cousas que nos explican no blog de VOZ NATURA. 

Premede nas imaxes:

No xornal LA VOZ DE GALICIA fixéronse eco desta saída:

 

PREVENCIÓN DE INCENDIOS FORESTAIS

O pasado 12 de febreiro un axente do servizo de SEPRONA (Servizo de Protección da Natureza) estivo no noso centro para impartir unhas charlas sobre a prevención de incendios forestais. Alumnos e alumnas de 1º e 2º de primaria (nunha primeira sesión)  e o alumnado de 4º de primaria (nunha segunda charla), participaron nestas charlas que son promovidas dentro do programa VOZ NATURA. Os obxectivos destas charlas son, en primeiro lugar, que os nenos e nenas coñezan que é a garda civil e que é o seu servizo de protección da natureza (SEPRONA); en segundo lugar, que coñezan como se poden previr os incendios forestais.

Explícanlles como traballan no seu labor continuo de protección do medioambiente e logo as charlas céntranse na loita contra os incendios forestais: as causas dos mesmos, as súas consecuencias, como podemos previlos e por último como debemos actuar ante un incendio, tamén o que non hai que facer nunca. Todo isto acompañado dunha presentación e con intervencións por parte dos nenos e nenas que non deixaron de facer preguntas e contar as súas experiencias sobre este grave problema da nosa contorna. 

CHARLAS SOBRE INCENDIOS FORESTAIS

Dentro do proxecto de VOZ NATURA, desenvolveuse esta semana, concretamente o 7 de novembro, unha actividade moi interesante: unhas charlas centradas principalmente nos incendios forestais e nas consecuencias para os nosos bosques e a nosa vida. Charlas efectuadas en dúas sesións: unha para o alumnado de 5º e 6º e outra para os nenos e nenas de 3º e 4º de primaria, na que ademais de atender á exposición do poñente, fixeron un montón de preguntas sobre o tema e explicaron tamén as súas vivencias con relación ao mesmo. 

Se premedes na seguinte imaxe teredes máis información no blog de VOZ NATURA "Entre salgueiros, bidueiros e carballos":

 

RUÍNAS, BOSQUES, HISTORIAS E MUSEOS

O martes, 16 de outubro, fixemos a primeira saída do actual curso, saída que compartimos con algunha das persoas maiores que integran o Centro Residencial de San Amaro e na que participaron os alumnos e alumnas de 5º e 6º de primaria  acompañados polos seus titores e outro profesorado do centro. Foi unha saída onde combinamos a historia coa paisaxe: visitamos as ruínas do convento de Santa Comba de Naves e a súa capela, paseamos polo fermoso bosque de Falán, rematamos no pobo da Conchada coa visita dos interesantes museos-etnográficos de Elías e contamos coa presenza de alguén que nos fixo volver a tempos pasados...

Se queredes coñecer máis como se desenvolveu esta actividade facede click na imaxe para ver a nova no blog do proxecto Voz Natura do centro:

VOZ NATURA 2018-19

Por quinto ano consecutivo somos un dos centros participantes no programa de educación ambiental VOZ NATURA, programa que dende fai 22 anos ven desenvolvendo en Galicia a fundación Santiago Rey Fernández-Latorre e cuxo obxectivo principal e concienciar e implicar á comunidade escolar de Galicia na recuperación e defensa da natureza. 

O lema desta 22ª edición é: "SOMOS ÚNICOS POR ALGO ÚNICO: O NOSO MONTE", e aínda que poden desenvolverse calquera tipo de proxectos de acción directa sobre o medioambiente... VOZ NATURA dará especial protagonismo  á preservación e coidado dos montes: protección, recuperación e posta en valor da riqueza dos montes e bosques galegos, conservación da súa biodiversidade e sensibilización social sobre a problemática dos incendios forestais (sinopse extraída da páxina web oficial do programa).

 

  "ENTRE SALGUEIROS, BIDUEIROS E CARBALLOS" é o título do proxecto que desenvolveremos no noso centro a partir da proposta anterior e co que queremos descubrir a importancia que teñen os bosques autóctonos. Os bosques que están baseados en árbores propias desta terra, daquelas especies que, ao longo de séculos, foron capaces de adaptarse mellor ás condicións de acidez do noso chan, á nosa humidade e pluviosidade, á temperatura e aos ventos, e aos perfís das nosas vellas montañas. Coma todos os anos, tamén continuaremos coas actividades do horto escolar e "escola ponte guapa".

Todas as actividades que iremos realizando ao longo do curso (aínda que ás veces faremos referencia a elas nesta páxina web) podedes coñecelas a través do blog do noso proxecto, blog, que como cada curso, cambia de logo e nome de acordo co título de dito proxecto: 

 

Aquí tedes o primeiro comunicado para as familias con información sobre o proxecto. Esperamos contar coa vosa colaboración:

 

FESTA VOZ NATURA

Xa temos aquí algunhas das fotos tomadas no PHOTOCALL que sobre o PATRIMONIO instalamos na FESTA DE VOZ NATURA 2018.

COLABORACIÓN COAS FAMILIAS

Nunha entrada anterior xa comentamos que estamos desenvolvendo o proxecto "AUGA, PEDRA, SABEDORÍA E TERRA", que aínda que nun principio naceu como o proxecto do programa VOZ NATURA, foi adoptado como proxecto documental integrado do centro para levar a cabo ao longo do presente curso. Entre as actividades que realizaremos, destacamos a celebración dos encontros que chamamos "ENCONTROS 4X" (ENCONTROS CATRO XERACIÓNS), nos cales pretendemos a convivencia e o intercambio interxeracional entre nenos/as, pais/nais, avós/avoas e bisavós/bisavoas. 

O pasado 20 de novembro con motivo da celebración do DÍA INTERNACIONAL DOS DEREITOS DOS NENOS,

tivemos a primeira destas actividades "CANDO FUN NENO/A":

avós e avoas de nenos do colexio e persoas maiores da RESIDENCIA FOGAR SAN AMARO, acudiron ao centro para explicarlles aos alumnos como viviron a súa infancia, os recordos que teñen dela, os seus xogos e xoguetes, como foi o seu paso pola escola, os seus traballos de pequenos, como era a súa vida en familia, que comían... Os nenos e nenas fixéronlles unha morea de preguntas e descubriron o diferente que era a súa propia infancia da que tiveron os seus avós ou bisavós, e de como foron evolucionando os dereitos dos nenos a través do tempo. 

Se premedes nos seguintes enlaces teredes máis información e imaxes sobre a actividade:

- Blog do Proxecto Voz Natura

- Blog da Biblioteca do centro 

Dende aquí queremos animar a pais/nais, avós/avoas, bisavós/bisavoas a que participen con nós nestes encontros, só tedes que anotarvos no centro en calquera das actividades que temos previstas ao longo do curso:

ENCONTROS 4X  DATA
CANTO Á VIDA  DÍA INTERNACIONAL DA ELIMINACIÓN DA VIOLENCIA CONTRA A MULLER - 25 DE NOVEMBRO
ONDE AS MULLERES AÍNDA SOMOS MINORÍA 

 DÍA INTERNACIONAL DA MULLER 

8 DE MARZO 

AS TÉMPORAS

DÍA MUNDIAL DA METEOROLOXÍA

23 DE MARZO 

XOGANDO XUNTOS 

DÍA INTERNACIONAL DO DEPORTE 

6 DE ABRIL  

CONTO O QUE ME CONTARON

SEMANA DAS LETRAS GALEGAS

DO 14 AO 18 DE MAIO

CANDO O ALUMNO FALA DO MESTRE 
FAGO COUSAS COA NATUREZA
CAMIÑANDO XUNTOS

DÍA MUNDIAL DO MEDIO AMBIENTE

5 DE XUÑO

 

No seguinte enlace podedes descargar a ficha de inscrición que podedes enviar polos nenos. Logo, dende o centro, xa nos poremos en contacto con vós para concretar a actividade. Grazas de antemán a todos pola vosa colaboración: 

Ficha de inscrición

Powered by Drupal - Design by artinet