III CONCURSO FOTOGRAFÍA A METEOROLOXÍA: O INVERNO

Na entrada do centro xa están expostas as fotografías gañadoras e todas as fotos participantes no

III CONCURSO FOTOGRAFÍA A METEOROLOXÍA:                                         O INVERNO      

 

As fotos gañadoras desta edición son:              

1º premio: "Pícnic na neve" de Arón Junco de 2º EP

2º premio: "Parece neve!" de Xiana Corderí de 5º EP

3º premio: "Un inverno diferente" de Aldara García de 4º EP  

Parabéns aos gañadores e grazas a todos unha vez máis pola participación. 

Agora só queda ir preparando a cámara para fotografar os cambios que ocorren na natureza na estación que acabamos de comezar: a primavera!.

 

Podedes ver todas as fotografías na seguinte presentación:

 

SEGURIDADE EN INTERNET

No pasado mes de febreiro realizarase no centro unha charla sobre o acoso escolar enmarcada dentro do PLAN DIRECTOR PARA A CONVIVENCIA E MELLORA DA SEGURIDADE NOS CENTROS EDUCATIVOS E NAS SÚAS CONTORNAS. Este pasado 27 de marzo dentro do mesmo plan, promovido pola Xunta de Galicia en colaboración coas forzas de seguridade do estado, realizouse outra charla, esta vez adicada á Seguridade en Internet e nas Redes Sociais. Consideramos que o avance continuo das novas tecnoloxías e os riscos que conleva o uso de Internet fan necesario actividades de formación para que alumnos e alumnas naveguen seguros pola rede e saiban conducirse axeitadamente.

Unha vez máis, Lorena, axente da Policía Nacional, explicoulles aos rapaces e rapazas de 5º e 6º de primaria todos aqueles aspectos que teñen que ver coa seguridade ao navegar por Internet, comezando por informalos sobre o que era a identidade dixital de cada un dos que navegamos pola rede. Logo indicoulles cales son as medidas básicas de seguridade que debemos empregar para protexer os nosos datos e a nosa identidade e como actuar sempre con cautela. Os alumnos e alumnas expuxeron tamén as súas dúbidas e algunha das súas experiencias.

 

 

 

 

 

 

 

 

 

Deixámosvos un enlace á páxina web PANTALLAS AMIGAS, onde podedes consultar información e visualizar vídeos e presentaciones relacionadas co uso seguro e responsable de internet e de outras ferramentas TICs por parte de nenos e adolescentes. 

(Fai clic na imaxe para acceder á páxina web)

 

No seguinte póster tedes unhas regras básicas para navegar con seguridade por INTERNET:

 

DÍAS MUNDIALES DOS BOSQUES, DA AUGA E DA METEOROLOXÍA

Un ano máis celebramos na semana do 18 ao 24 de marzo o DÍA MUNDIAL DA AUGA (21 de marzo), o DÍA INTERNACIONAL DOS BOSQUES (22 de marzo) e o DÍA METEOROLÓXICO MUNDIAL (23 de marzo), con diversas actividades para destacar a importancia destes elementos na nosa vida e en toda a natureza e sensibilizar sobre o coidado e protección do medio ambiente en xeral. Destacamos algunha delas:

1- Plantación de árbores. Os máis pequenos/as do cole plantaron castiñeiros e carballos a partir de castañas e belotas que trouxeron das súas casas. 

2- Os maiores de 4º, 5º e 6 plantaron 3 bidueiros que nos enviou a Deputación Provincial. Primeiramente nas aulas traballaron o libro "DAMA DE AUGA E O SEGREDO DAS ÁRBORES", (enviado tamén pola Deputación Provincial), libro que ten como protagonista á Dama de Auga, amiga das augas e das árbores que vivía nas terras de Ourense xunto coas ninfas e os gnomos e que loitará para liberar e salvar da contaminación dez árbores que aparecen na historia.

 Cada curso púxolle o nome ao seu bidueiro e encargarase do seu coidado. 

3- Dende o equipo de biblioteca tamén quixeron que a sensibilización cara o coidado e protección do medio ambiente foran o eixe da temática para a celebración do DÍA MUNDIAL DA POESÍA (21 de marzo). Así xa expuxeron as poesías que sobre A NATUREZA  realizaron os alumnos e alumnas do centro.

 

 (Premede na imaxe para ver todas as poesías no blog do equipo da biblioteca escolar).

4- Realizouse a selección de fotografías do concurso fotográfico sobre o inverno que convocara o equipo de METEOESCOLAS do centro (da que vos informaremos en breve). 

SERVIZOS COMPLEMENTARIOS CURSO 2019/20

Tal e como establece a normativa vixente, ao longo do mes de abril deberedes presentar no centro a solicitude de uso do servizo de transporte e/ou comedor escolar para o vindeiro curso 2019/20. O prazo de presentación da mesma remata o 30 de abril. 

Aínda que a solicitude xa foi entregada a todo o alumnado, podedes descargala premendo na seguinte imaxe:

 

DÍA GRANDE DO ENTROIDO 2019

"O NOSO BOSQUE FOI ESTRAGADO, QUEIMADO...

TEREMOS QUE LOITAR PARA QUE SEXA SALVADO 

E VOLVER A CONVERTILO NUN BOSQUE ANIMADO"

Por iso neste entroido mouchos, curuxas, fadas,

trasnos, excursionistas, ninfas, lobos... foron desfilando

e... "QUE VOLVA AO BOSQUE A VIDA" ían cantando.  

1. Os trasnos xoguetóns brincan e bulen, 

correndo polo bosque, escapan do lume.

2. O bosque está en cinzas, negro, queimado...

loitaremos xuntos para poder reanimalo.

3. Lobos ouvean no medio da noite escura

feridos e tristes buscan do bosque a cura.

4. Os mouchos queren que volva á fraga a vida

animándoa coa súa vistosa plumaxe colorida. 

5. As ninfas que coidan das árbores, plantas e flores,

limpan os ríos, os regatos e as fontes.

6. Tamén as etéreas fadas, gardiás da natureza,          

percorren soutos, fragas...devolvéndolles a súa beleza.

7. Polas carballeiras excursionistas van camiñando...

observando, limpando e o monte coidando. 

8. Os leñadores amantes das árbores nosas

cortan o eucalipto e repoboan con especies autóctonas. 

9. Ata novos "Robin Hood" queren unirse á nosa loita

"COIDA A NATUREZA" xa todo o mundo escoita. 

 

O noso entroido nos xornais impresos:

LA VOZ DE GALICIA:

FARO DE VIGO:

LA REGIÓN:
 
 
 
E nas edicións dixitais:
 
                                        GALERÍA DE FOTOS
 
 
 
 

ENTROIDO 2019: ORDES DO MECO

E comezamos a semana máis "entroideira" do ano cos mandadiños do noso meco, que todos os nenos e nenas do cole cumpriron á perfección:

1- O LUNS, cansados de troulear a fin de semana.. custa erguerse da cama

pois non se diga máis... imos todos ao cole en pixama!!


 2- O MARTES soñamos con viaxar: Francia, China, México, Xapón...

    que bonitos países para ir de vacacións!!

 

3- O MÉRCORES sufrimos unha invasión: princesas, superheroes, Mario, Brancaneves...

... todos os personaxes de ficción que imaxinedes!! 

4- E por último O XOVES non paramos de cantar e bailar...

iso si... só bo rock and roll  a rabiar!!!

 

ADMISIÓN E MATRÍCULA CURSO 2019-20

                                                                

(Facede clic na imaxe para acceder a toda a información)

  

CALENDARIO-RESUMO DO PROCESO DE ADMISIÓN E MATRÍCULA

Presentación de solicitudes de admisión  do 01 ao 20 de marzo 
Publicación da lista provisional de admitidos e non      admitidos  24 de abril 
Prazo de reclamación  do 25 de abril ao 02 de maio 
Publicación da lista definitiva de admitidos e non         admitidos 14 de maio 
Prazo de formalización da matrícula  do 20 ao 30 de xuño 

 Nos seguintes enlaces podedes descargar a normativa que regula o proceso de admisión e matrícula: 

 Decreto 254/2012 polo que se regula a admisión do alumnado
 Orde do 12 de marzo de 2013 que desenvolve o Decreto 254/2012
 Orde do 25 de xaneiro de 2017 pola que se modifica a Orde do 12 de                    marzo de 2013
 Zonas de influencia do CEIP Plurilingüe Profesor Albino Núñez 

A documentación a presentar para as solicitudes de admisión é a seguinte:

Impreso de solicitude de admisión (ED550B)           

Orixinal ou copia cotexada do DNI do alumno/a (se o ten), e dos seus pais.

Orixinal ou copia cotexada do Libro de Familia.
Documento acreditativo de estar en disposición de reunir os requisitos académicos esixidos para o curso para o que solicita praza (só para alumnado de primaria).
Convenio regulador ou resolución xudicial de separación xudicial ou divorcio onde conste a custodia do menos, se é o caso. 
Cuestionario sobre lingua materna (só alumnado de 4º de infantil (3 anos))

* A solicitude terá que estar asinada por calquera das/os titulares da patria potestade ou representantes legais. No caso de separación ou divorcio será necesaria a sinatura de ambas/os proxenitoras/es, agás que a patria potestade estea atribuída, con carácter exclusivo, a un deles. En ambos casos, será necesario presentar, xunto coa solicitude de admisión, a resolución xudicial correspondente para o seu cotexo polo centro educativo. No suposto de alumnado afectado por situación de violencia de xénero non será exixible o previsto no parágrafo anterior.

ENTROIDO 2019: ORDES DO MECO

E comezamos a semana do entroido coas tradicionais ORDES DO MECO, atentos, comezamos o LUNS vestidos con PIXAMA e remataremos o venres co noso desfile do BOSQUE ANIMADO!!!

 

ARTES ESCÉNICAS: BURBUJAS DE PAPEL

Esta vez foron os máis pequenos e pequenas do cole (todo o alumnado de infantil) os que acudiron o 20 de febreiro ao Auditorio Municipal para presenciar o espectáculo BURBUJAS DE PAPEL da compañía MÚCAB DANS. Compañía de danza que combina as artes escénicas e as visuais, para atopar un linguaxe propio nos seus traballos co fin de facer chegar ao público a linguaxe do movemento. 

"Este espectáculo sen palabras combina a danza, a música e a interacción multimedia, creando unha proposta visual e plástica que xoga desde a imaxinación d@ nen@ para ir a un mundo fantástico. Roger, un trompetista namorado das burbullas, coñece unha fada falcatrueira que o axudará a conseguir o seu obxectivo, devolverlle as ganas de xogar, rir, imaxinar e bailar a todo o mundo" (Senopse extraída da páxina web de AFundación).

Os nenos e nenas fixeron un percorrido por un mundo fantástico cheo de burbullas de xabón, de papel, dixitais, de globos, con sombras, con luz negra... un espectáculo máxico e dinámico onde os pequenos e pequenas acabaron participando activamente viaxando a Bombalia, o país das burbullas.

 

PLAN DIRECTOR: CHARLA CONTRA O ACOSO ESCOLAR

Un ano máis a Delegación do Goberno en Galicia e a Alta Inspección de Educación puxeron en marcha o PLAN DIRECTOR PARA A CONVIVENCIA E A MELLORA DA SEGURIDADE  NOS CENTROS EDUCATIVOS E NOS SEUS CONTORNOS. O principal obxectivo do mesmo é o de mellorar a convivencia nos centros e na comunidade educativa, fomentando valores de respecto a partir da prevención e da información en temas como: acoso escolar, novas tecnoloxías, violencia de xénero, drogas e alcol... Estas charlas son impartidas por persoal especialista dos Corpos de Seguridade do Estado.

Concretamente ao noso centro acudiu, Lorena, membro da Policía Nacional, que impartiu o día 20 de febreiro unha charla informativa sobre o acoso escolar. Durante a mesma explicoulles aos alumnos e alumnas de 5º e 6º de primaria que era o acoso escolar, onde ocorría, cales eran as partes implicadas no mesmo: vítima, acosador e observadores. Cales son os diferentes tipos de acoso: físico, psicolóxico, verbal, social, sexual e ciberacoso; así como as medidas a adoptar en caso de ser vítima ou observador dalgún problema de acoso no centro ou no seu contorno. Logo os rapaces e rapazas interactuaron con ela formulándolle preguntas e contando as súas vivencias con respecto a este grave problema. 

 

ENLACES:

- BREVES PAUTAS PARA PAIS E NAIS SOBRE COMO ACTUAR ANTE O ACOSO ESCOLAR E O CIBERACOSO.

- CONSELLOS DO PLAN DIRECTOR PARA O ALUMNADO.

 

Powered by Drupal - Design by artinet